ENERGETIKLAR MUNOSIB TAQDIRLANDI

Bugun, 24-dekabr kuni “Hududiy elektr tarmoqlari” AJda iste’molchilarga barqaror elektr energiyasi yetkazib berishdek mas’uliyatli vazifani mashaqqat bilan ado etayotgan bir guruh kasb fidoyilarini munosib taqdirlashga bag‘ishlangan tadbir bo‘lib o‘tdi.  Unda tizimda ko‘p yillardan buyon mehnat qilib kelayotgan soha xodimlari, faxriy energetiklar va markaziy apparati xodimlari ishtirok etdi.  

Ma’lumki, “Hududiy elektr tarmoqlari” AJ va uning tarkibiy korxonalarida 27 mingdan ortiq ishchi xodimlar iste’molchilarga barqaror elektr energiyasi yetkazib berish maqsadida tunu-kun faoliyat yuritishmoqda. 

Tadbirda sо‘zga chiqqan “Hududiy elektr tarmoqlari” AJ Boshqaruv raisi Asrorjon Asqarov yig‘ilganlarni bayram munosabati bilan samimiy tabriklab, ularga sihat-salomatlik, ishlariga rivoj va muvaffaqiyatlar tiladi.

Ta’kidlanganidek, “Hududiy elektr tarmoqlari” AJ tomonidan  joriy yil kuz-qish mavsumiga tayyorgarlik ko‘rish, xususan respublikamiz bo‘ylab past kuchlanishli elektr tarmoqlarini yangilash hamda modernizatsiya qilish bo‘yicha salmoqli ishlar amalga oshirildi. Olib borilgan bunday amaliy harakatlar natijasida joylarda elektr energiyasi yetkazib berish sifati birmuncha yaxshilandi. Ayniqsa, hozirgi qish oylarida tizimda 24 soatlik ish rejimiga o‘tilgani, “Tezkor dispetcherlik shtabi”, aholi murojaatlarini tunu kun qabul qilish hamda tezkor hal etish bo‘yicha tizimli ishlar bajarilayotgani xalqimiz turmush farovonligini ta’minlashga xizmat qilib kelmoqda.

Tadbir so‘nggida о‘z mehnati va jonkuyarligi bilan boshqalarga о‘rnak bо‘layotgan xodimlarga “Hududiy elektr tarmoqlari” AJning tashakkurnomalari topshirildi.