СИНОВЛИ КУНЛАРДА ЕЛКАДОШ БЎЛИБ...

Кўпи кетиб ози қолди. Асосийси, умид сўнмасин. Сардоба бугун омонли кунларга юз тутди. Яхши кунларни умид билан кутган халқи Президентимиз ташаббуси билан яна гўзал ва фаровон ҳаётга қадам қўймоқда. Бу йўлда эса катта жамоа ва куч бирлиги жалб этилди. Бугун Сардоба учун ҳар бир ҳудуддан «ҳашар карвонлари» ташкил этилган бўлиб, талафотдан азият чеккан аҳоли учун янги уй-жойлар барпо этишга киришилди.

Хабарингиз бор, Сирдарё вилоятида жойлашган «Сардоба» сув омбори ёрилиши натижасида юзага келган тошқинда Сардоба туманининг кўплаб ҳудуди сув остида қолган эди. Сирдарё вилоятининг Оқолтин тумани ҳам шулар жумласидан. Оқолтин тумани «Ризамат ота» – узум навининг султони таърифи билан машҳур, айнан шу узум навини етиштирган моҳир узумшунос Ризамат ота шу ерда туғилиб ўсган экан.

«Toshkent shahar elektr tarmoqlari korхonasi» АJ тасарруфидаги туман электр таъминоти корхоналарининг 40 нафардан иборат ишчиси мазкур тумандаги «Саховат» маҳалласида олиб борилаётган қурилиш-таъмирлаш ишларига сафарбар этилиб, айни дамда улар зарар кўрган аҳоли яшаш хонадонлари ҳамда янги қурилаётган турар жойларни электр энергияси билан таъминлаш ишларига жалб этилган.

Бу ерда минглаб ишчилар жонбозлик билан меҳнат қилмоқда. Ушбу хайрли ишга ўзимизнинг ҳиссамизни қўшаётганимиздан мамнунмиз. Биз кеча-ю кундуз ишлаётган бўлсак ҳам, халқимиз осойишталиги учун қўлдан келганча ҳаракат қиляпмиз. Ҳозирда туманлардаги аҳоли истеъмолчиларини электр энергияси билан таъминлаш ишлари жадаллик билан олиб борилмоқда. «Toshkent shahar elektr tarmoqlari korxonasi» AJ ҳам барча ҳудудий электр тармоқлари корхоналари билан бир қаторда, ҳамжиҳатликда электр узатиш тармоқларини янгитдан тиклаш ишларида қатнашмоқда, - дейди жамият тизимидаги М. Улуғбек ТЭТК раҳбари  Н. Исроилов.

Айни вақтда жамиятнинг тажрибали мутахассислари махсус техник воситалар ёрдамида янги темир-бетон таянчлар ўрнатиш ва электр тармоқларини тортиш ишларини олиб бормоқдалар. Бунда ишчи-ходимларнинг қурилиш жойларида санитария-гигиена қоидаларига қатъий риоя этишларига алоҳида аҳамият қаратилган.

Сардоба учун енг шимариб, камарбаста бўлган инсонларнинг саховатли ва кўнгилли кўмаги халқимиз буюклигини намоён этди.

«Toshkent shahar ЕТК» AJ матбуот хизмати